Nasib Dak, Bagian Jauh
aku nak numpang bacarito, entah beno nia entah salah,
ikak cerito zaman dulu kala, ”nasib dak bagian jauh, anak umang piatu lepas”.
Anak umang piatu lepas, takeper takaredang,
mulai dai kecik idup sare, nurut ke ughang tue, diam diume dulu dusun,
kadang makan kadang dak, nunggu pondok atap saredang,
Basawah ngambik upah, bakebon paroan pulek.
Paroan bagi tige, dapat sabagian dikit pulek
itulah sangkan hidup sare, talepik malakare…
Awak kidas, kareteng pulek
Ulas jat, itam kelet, bungkuk balide
Kecik palituk, kapalak catok
Omor enam taun tinggalke bapuk, omor sepuluh taun ditinggal induk,
suek ughang bakal ke ngurus, sanak pangeman banyak dak agam,
Dulur suek, rantue suek, tinggal sughang di pondok talang
lantaran sare suek di rete, cuma ade kebon parah tue …
kapan takuk dak bagetah, paling ke dapat due kilu.
Abis aghai maraih bulan, abis bulan maraih taun, awak batamba besok,
pancarian cuma salubang, nafsu ade suek gek sanatan,
tambah aghai batambah nanggung ….
Ndak marantau bute huruf, dak pacak mace huruf mbak gonong
Nulis dak pacak, bacawa pelor, bakalakar tambah dak tau.
Awak batambah besok, tafikir endak mukak utan,
nebang kayu makai baliung, suek sanak pangeman tapare nulung,
ughang baume babidang–bidang, tubuk cuma baume salongkang batang ...
Nanam padi dak olah ngetam, bakebon suek di oleh
Butang dak denjuk ughang, nak mintek apelagi
batiup angen ke jawe, amon ndak idup tarik nyawe
Ngelik kawan sabaye rate bakule, tubuk lum pacak lantaran sare,
nyubo ngepek gadis sakampung, tubuk linjang ughang dak linjang,
walau di rayu masih dak agam, muat dak pacak tido malam,
bakule bae dak bagadai, mane ke rasan lakar ke sampai,
suek ughang endak linjang di ughang sare, rate milih ughang bajik serte sugi,
meski ujo cinta terkadang bute, mon dajak sare die mancelang
Jalan linjang mintar balaki, timbul tubuk maule–ule,
awak renang disangko gile, itulah amon idup sare,
janganke yang ulas londa, serte gadis ejat dak ngalale.....
Mungkin ikak takdir tuhan, nguji umatnye supayo baiman,
suek ughang tughun kabomi endak sare, apeke lagi banasep malang,
malore awak dewek, ughang tawe tubuk nyamulung…
Cukup la ikak ku bacarito, mungkin pacak dambik hikmahnye
Make nye idup endaklah sabar, selalu bado’a kepade tuhan,
galak ngaji serte sembahyang, supayo fikiran dak melayang,
ngalababe kilo kulu, bagawe segan batambah buntu.
Walau anak yatim piatu, segaleknya ade rezeki dienjuk tuhan,
amon kitek memang baiman, ade bae tuhan ngenjuk jalan,
asal babeno pacaye diri...
Nasib kitek dak baubah, amon fikiran sempit serte susah,
cobo bapintek tengah malam, mujur dapat petunjuk tuhan,
jangan nyame ke ughang batuah, malenggak kapucuk kelik kabawa
pandang ke pulek kidau kanan,…
Walaupun sare lagi ke susah, galak–galak basadekah,
ngape salalu dinggap panyakit, oleh ade rezeki jadi pelit,
itulah harte dak barekat, ape lagi dapat dingen jalan sesat,
anak cucung lakar melarat ….
Amon tuhan ndak ngenjuk jalan, gek gelap jadilah terang
Jalan terang menjadi lapang.
Ulas jat kenannye ringkih, kulit itam menjadi putih
apelagi mon barangen naek Mercy
Janganke gadis baulas jat, gek londa ngigit bibo badagha-dagha
Janganke kijap, sengom bae die pacak gile
Dunia genggam nasib babalek ...
Kepade segalek hadirin di sikak, aku bukan ndak jadi guru,
amon salah maafke aku, wak mamak kupik kuyung, aku ndak baije tughun panggung,
maaf mon ade kate dak nyambung, maaf ke aku amon tasinggung
sekali lagi ku mintek maaf, jangan ngotok ku dingen puntung…
Wassalam,
